काठमाडौ, असार २४ । तेज नेपाल
विश्वकप २०२६ को अन्तिम १६ मा साविक विजेता अर्जेन्टिनाले फुटबल इतिहासकै अविस्मरणीय पुनरागमन गर्दै इजिप्टलाई ३–२ ले पराजित गरेको छ। खेलको ६७औँ मिनेटसम्म २–० ले पछि परेको अर्जेन्टिनाले अन्तिम ११ मिनेटमा लगातार तीन गोल गर्दै रोमाञ्चक जित निकालेको हो।
खेलको १५औँ मिनेटमा यासेर इब्राहिमले गोल गर्दै इजिप्टलाई अग्रता दिलाएका थिए। त्यसपछि ६७औँ मिनेटमा मोस्ताफा जिजोले दोस्रो गोल थपेपछि अर्जेन्टिना प्रतियोगिताबाट बाहिरिने अवस्थामा पुगेको थियो। इजिप्टका गोलकिपर मोस्ताफा शोबिरले पनि लगातार उत्कृष्ट बचाउ गर्दै अर्जेन्टिनामाथि ठूलो दबाब सिर्जना गरेका थिए।
तर त्यसपछि खेलको चित्र नै बदलियो। ७९औँ मिनेटमा क्रिस्टियन रोमेरोले हेडमार्फत गोल गर्दै अर्जेन्टिनाको पुनरागमनको सुरुआत गरे। ८३औँ मिनेटमा कप्तान लियोनेल मेस्सीले बराबरी गोल गर्दै लाखौँ समर्थकलाई नयाँ आशा दिए। इन्जुरी समयको दोस्रो मिनेटमा एन्जो फर्नान्डेजले विजयी गोल गरेपछि अर्जेन्टिनाले ३–२ को ऐतिहासिक जित दर्ता गर्यो।
यस खेलमा मेस्सीले सुरुमै पेनाल्टी गुमाए पनि निर्णायक क्षणमा टोलीलाई बचाउँदै आफ्नो नेतृत्व फेरि एकपटक प्रमाणित गरे। अन्तिम सिट्टी बज्नेबित्तिकै खेलाडी र समर्थकको खुसीको सीमा रहेन, जबकि उत्कृष्ट प्रदर्शन गरेको इजिप्टको विश्वकप यात्रा भने भावुक अन्त्यमा टुंगियो।
यो जितसँगै अर्जेन्टिना क्वार्टरफाइनलमा प्रवेश गरेको छ। अन्तिम क्षणसम्म हार नमान्ने अर्जेन्टिनाको यो पुनरागमन विश्वकप २०२६ कै सबैभन्दा नाटकीय खेलमध्ये एकका रूपमा स्मरणीय रहनेछ।