काठमाडौ, असार २४ । तेज नेपाल
फिफा विश्वकप २०२६ को अन्तिम १६ अन्तर्गत भएको अत्यन्तै रोमाञ्चक भिडन्तमा स्विट्जरल्यान्डले कोलम्बियालाई पेनाल्टी सुटआउटमा ४–३ ले पराजित गर्दै ७२ वर्षपछि विश्वकपको क्वार्टरफाइनलमा स्थान सुरक्षित गरेको छ। निर्धारित ९० मिनेट र थपिएको ३० मिनेटसम्म दुवै टोलीले गोल गर्न नसकेपछि खेलको निर्णय पेनाल्टीबाट भएको थियो।
भ्यानकुभरमा भएको खेलमा कोलम्बियाले बल नियन्त्रण र आक्रमणमा केही दबाब बनाए पनि स्विट्जरल्यान्डका गोलरक्षक ग्रेगोर कोबेल चट्टानझैँ उभिए। उनले नियमित समयदेखि नै महत्वपूर्ण बचाउ गर्दै टोलीलाई खेलमा टिकाइराखे र पेनाल्टी सुटआउटमा पनि निर्णायक बचाउ गर्दै नायक बने।
पेनाल्टी सुटआउटमा दुवै टोलीबीच कडा प्रतिस्पर्धा भयो। अन्ततः रुबिन भार्गासले निर्णायक पेनाल्टीलाई गोलमा परिणत गरेपछि स्विट्जरल्यान्डका खेलाडी र समर्थक उत्सवमा डुबेका थिए। उता, उत्कृष्ट खेल प्रदर्शन गरे पनि कोलम्बियाको विश्वकप यात्रा भने अन्त्य भयो।
यस जितसँगै स्विट्जरल्यान्डले सन् १९५४ पछि पहिलो पटक विश्वकपको क्वार्टरफाइनलमा स्थान बनाएको छ। अब उसले क्वार्टरफाइनलमा अर्जेन्टिनाको सामना गर्नेछ। अर्जेन्टिनाले अन्तिम १६ मा इजिप्टविरुद्ध २–० ले पछि परेको अवस्था उल्टाउँदै ३–२ को अविस्मरणीय जित निकालेको थियो।
स्विट्जरल्यान्डको अनुशासित रक्षापङ्क्ति, कोबेलको उत्कृष्ट गोलकिपिङ र पेनाल्टीमा देखाएको धैर्यले टोलीलाई इतिहास रच्न सफल बनाएको छ। अब विश्वकपमा अर्जेन्टिना र स्विट्जरल्यान्डबीच हुने क्वार्टरफाइनल भिडन्तप्रति विश्वभरका फुटबल समर्थकको नजर केन्द्रित भएको छ।