देउखुरी २० चैत । तेजनेपाल
लुम्बिनी प्रदेशका मुख्यमन्त्री चेतनारायण आचार्यले सहकारी संस्थाहरू उत्पादनमा नजोडिँदासम्म प्रदेशले समृद्धिको लक्ष्य पूरा गर्न नसक्ने बताउनु भएको छ । ६८ औँ राष्ट्रिय सहकारी दिवसको अवसरमा लुम्बिनी प्रदेशका उत्कृष्ट सहकारी संस्थाहरूलाई पुरस्कार प्रदान कार्यक्रमलाई सम्बोधन गर्दै मुख्यमन्त्री आचार्यले स्थानीय उत्पादन बढाउन सहकारी संस्थाहरू अनिवार्य रूपमा जोडिनुपर्ने बताउनु भएको हो ।
‘जुन लक्ष्य र उद्देश्य बोकेर सहकारीहरू निर्माण भएका छन् । जसरी उत्पादनसँग जोडिनुपथ्र्यो । त्यसरी नजोडिएको देखेको छु’उहाँले भन्नुभयो–‘सहकारी संस्थाको माध्यमबाट स्थानीय उत्पादन बढाउन सकिन्छ । किसानको उत्पादन बजारसम्म पुर्याउन सकिन्छ । आयआर्जन बढाउन सकिन्छ । किसानको जीवनस्तर माथि उठाउन सकिन्छ ।’
हरेक सहकारी संस्था उत्पादनसँग जोडिनुपर्नेमा मुख्यमन्त्री आचार्यको जोड छ । समाजवादको आधारशिला सहकारी भएको र प्रदेश सरकारले सहकारी क्षेत्रलाई प्राथमिकतामा राखेर काम गरिरहेको बताउनु भयो ।
पछिल्लो समय सहकारीहरू आफ्ना लक्ष्य, उद्देश्यभन्दा बाहिर गएर काम गर्दा समस्या उत्पन्न भएको र त्यसलाई ट्र्याकमा ल्याउने काम सरकारले गरिरहेको जानकारी गराउनु भयो ।
‘नियतबस खोलिएका सहकारीका कारण अत्यन्त राम्रो काम गरेका सहकारीहरूप्रति पनि मान्छेहरूले औंला ठड्याउने परिस्थिति निर्माण भएको छ । तर, राम्रो काम गर्ने सहकारी अभियन्ताहरू विचलित हुने अवस्था आउन दिने छैनौं’उहाँले भन्नुभयो–‘नकारात्मक काम गर्ने, उपभोक्ताको रकम अपचलन गर्ने त्यस्ता सहकारीलाई निरुत्साहित गर्ने, कानुनी दायरामा ल्याउने काम भइरहेका छन् ।’
राम्रो काम गरेका सहकारी संस्थालाई प्रोत्साहन गर्ने नीति सरकारले लिएको बताउनु भयो । सहकारी अभियानलाई अझ व्यापक बनाउनुपर्नेमा मुख्यमन्त्री आचार्यले जोड दिनुभयो ।
कृषि, भूमि व्यवस्था तथा सहकारी मन्त्री दिनेश पन्थीको अध्यक्षता तथा मुख्यमन्त्री चेतनारायण आचार्यको प्रमुख आतिथ्यतामा भएको कार्यक्रममा बाेल्दै मन्त्री पन्थीले सरकारले ५० जना कर्मचारीहरूलाई तालिम दिई अब प्रदेशभरिका सबैमा सहकारी संस्था प्रदेश सरकार पुग्ने बताउनुभयाे । उहाँले सके यही आर्थिक बर्ष नभए आउने आर्थिक बर्षमा भए पनि आवश्यक बजेटकाे व्यवस्था गरेर सहकारी संस्थाहरूलाई उत्पादन संघ जाेड्ने गरी काम गर्ने तयारी रहेकाे बताउनुभयाे ।
कृषि, भूमि व्यवस्था तथा सहकारी मन्त्रालयका सचिव यामनारायण देवकोटाकाे स्वागत मन्तव्यबाट शुरू भएकाे कार्यक्रममा विभिन्न क्षेत्रमा उत्कृष्ट भएका चारवटा सहकारी संस्थाहरूलाई सम्मान तथा पुरस्कृत गरिएको थियो । यसरी पुरूस्कृत हुने सहकारी संस्थाहरूमा सिको बचत तथा ऋण सहकारी संस्था बर्दिया, नव हातेमालो बहुउद्देश्यीय सहकारी संस्था रुपन्देही, ताराताल साना किसान कृषि सहकारी संस्था बर्दिया, सबैको बचत तथा ऋण सहकारी संस्था रुपन्देहीलाई सम्मान गरिएको थियो । संस्थालाई नगद १०/१० हजारकाे राशीले पुरूस्कृत गरिएकाे थियाे ।
कार्यक्रममा मुख्यमन्त्री तथा मन्त्री परिषद् कार्यालयका प्रमुख सचिव बावुराम अधिकारी, लुम्बिनी प्रदेश योजना आयोगका उपाध्यक्ष डा.डिल्लीराज अर्याल, राप्ती गाउँपालिका अध्यक्ष प्रकाश बिष्ट र नेपाल बचत तथा ऋण केन्द्रिय सहकारी संघका बरिष्ठ उपाध्यक्ष दामोदर अधिकारी लगायतले मन्तब्य ब्यक्त गर्नु भएको थियो । कार्यक्रमकाे सञ्चालन प्रदेश सहकारी विकास वोर्डका कार्यकारी उपाध्यक्ष टिकाराम पोख्रेलले गर्नु भएको थियाे ।
About Tejnepal
