व्यवसाय, सङ्गीत र अन्तर्राष्ट्रिय सौन्दर्य प्रतियोगितामा सफलता हासिल गर्दै नेपाली महिलाको आत्मविश्वास र प्रतिभाको प्रतिनिधित्व
ललितपुर । आत्मविश्वास, दृढ इच्छाशक्ति, निरन्तर मेहनत र पारिवारिक सहयोग भए जीवनको जुनसुकै चरणमा पनि नयाँ सफलता हासिल गर्न सकिन्छ भन्ने प्रेरणादायी उदाहरण बनेकी छन् रोजी श्रेष्ठ। व्यवसाय, सङ्गीत र अन्तर्राष्ट्रिय सौन्दर्य प्रतियोगितामा आफ्नो पहिचान स्थापित गर्न सफल श्रेष्ठ पछिल्लो समय नेपाली महिलाको प्रतिभा, आत्मविश्वास र सशक्तीकरणको प्रतिनिधि पात्रका रूपमा परिचित हुँदै गएकी छन्।
धनुषा जिल्लाको मिथिला नगरपालिका–११, दूधपानी स्थायी घर भएकी श्रेष्ठका पिता इन्द्रबहादुर श्रेष्ठ र माता जमुना श्रेष्ठ हुन्। हाल ललितपुर महानगरपालिका–२३, धापाखेलमा बसोबास गर्दै आएकी उनी विगत २५ वर्षदेखि ‘रोजी आर्ट्स डिजिटल प्रिन्ट्स’ नामक प्रिन्टिङ व्यवसाय सञ्चालन गर्दै आएकी छन्। लामो व्यावसायिक अनुभव हासिल गरेकी श्रेष्ठलाई गायन तथा सङ्गीतमा पनि विशेष रुचि छ।
व्यावसायिक जिम्मेवारीसँगै आफ्नो सांगीतिक यात्रालाई समेत निरन्तरता दिँदै आएकी उनले आफ्नै युट्युब च्यानलमार्फत गीत–सङ्गीत प्रस्तुत गर्दै आएकी छन्। हालै उनको नयाँ गीत ‘तिमीले फूल दियौ’ सार्वजनिक भएको छ। व्यवसाय र कलालाई समानान्तर रूपमा अघि बढाउने उनको प्रयासले उनको बहुआयामिक व्यक्तित्वलाई उजागर गरेको छ।
राष्ट्रिय उपलब्धिदेखि अन्तर्राष्ट्रिय पहिचानसम्म
२०८३ साल साउन १६ गते राष्ट्रिय नाचघरमा समारी इन्टरनेसनलद्वारा आयोजित ‘मिसेस नेपाल इन्टरनेसनल वर्ल्ड’ प्रतियोगितामा विजेता बनेपछि श्रेष्ठको उपलब्धिको यात्रा अन्तर्राष्ट्रिय मञ्चसम्म पुगेको हो। उक्त सफलतासँगै उनले थाइल्याण्डको खोन केनमा आयोजित ‘क्लासिक मिसेस एसिया इन्टरनेसनल’ प्रतियोगितामा नेपालको प्रतिनिधित्व गर्ने अवसर प्राप्त गरिन्।
विश्वका १६ देशका प्रतिस्पर्धी सहभागी उक्त प्रतियोगितामा उनले तीनवटा महत्त्वपूर्ण उपाधि जित्न सफल भइन्। श्रेष्ठले ‘मिसेस एसिया फ्रेन्डसिप विनर’, ‘मिसेस ट्यालेन्ट क्विन’ र ‘मिसेस कन्फिडेन्स एसिया’ उपाधि प्राप्त गर्दै अन्तर्राष्ट्रिय स्तरमा नेपालको गौरव बढाइन्।
प्रतियोगिताका क्रममा उनले नेपाली मौलिक कला, संस्कृति र परम्पराको पहिचान झल्काउने प्रस्तुति दिएकी थिइन्। जीवित देवी कुमारीको सांस्कृतिक तथा धार्मिक महत्त्वबारे जानकारी गराउँदै कुमारी नृत्य प्रस्तुत गर्नु उनको विशेष आकर्षण बनेको थियो। यसमार्फत उनले अन्तर्राष्ट्रिय प्रतिस्पर्धी तथा दर्शकमाझ नेपाली संस्कृति र परम्पराको परिचय गराउने अवसरसमेत प्राप्त गरिन्।
विभिन्न देशका महिलासँग अनुभव आदानप्रदान गर्ने अवसरले पनि आफ्नो आत्मविश्वास र व्यक्तित्व विकासमा थप सहयोग पुगेको श्रेष्ठको अनुभव छ।
सफलताको आधार परिवारको साथ र आत्मविश्वास
आफ्नो सफलताको प्रमुख आधार परिवारको साथ, विश्वास र प्रेरणा रहेको श्रेष्ठ बताउँछिन्। विशेषगरी श्रीमान्को निरन्तर साथ र सहयोगले आफूलाई नयाँ अवसर खोज्न तथा आफ्ना रुचि र क्षमतालाई निरन्तरता दिन हौसला मिलेको उनको भनाइ छ।
व्यवसाय, सङ्गीत र सौन्दर्य प्रतियोगिताजस्ता फरक प्रकृतिका क्षेत्रमा सक्रिय रहन समय व्यवस्थापन र पारिवारिक जिम्मेवारीबीच सन्तुलन कायम गर्नु चुनौतीपूर्ण हुने उनी अनुभव सुनाउँछिन्। तर परिवारको सहयोग र विश्वासले ती चुनौती सामना गर्न सहज भएको उनको भनाइ छ। यसका साथै व्यवसायमा आबद्ध कर्मचारी तथा शुभचिन्तकहरूको योगदानप्रति पनि उनले आभार व्यक्त गरेकी छन्।
“व्यवसाय, सङ्गीत र सौन्दर्य प्रतियोगिताजस्ता विभिन्न क्षेत्रमा सक्रिय रहँदा धेरै समय र मेहनत आवश्यक पर्छ। त्यसका लागि पारिवारिक सहयोग पनि उत्तिकै महत्त्वपूर्ण हुन्छ। मलाई मेरा श्रीमान् तथा परिवारले देखाउनुभएको साथ, विश्वास र प्रेरणाले नै आफ्नो रुचि, प्रतिभा र जिम्मेवारीलाई सँगसँगै अघि बढाउन सम्भव भएको हो,” श्रेष्ठले बताइन्।
महिलाका लागि प्रेरणादायी यात्रा
रोजी श्रेष्ठको सफलता सौन्दर्य प्रतियोगितामा प्राप्त उपाधिमा मात्र सीमित छैन। २५ वर्ष लामो व्यावसायिक अनुभव, सङ्गीतप्रतिको निरन्तर लगाव र अन्तर्राष्ट्रिय मञ्चमा नेपालको प्रतिनिधित्व गर्ने अवसरले उनको बहुआयामिक क्षमता र सक्रियतालाई प्रमाणित गरेको छ।
उनको यात्राले महिलाको प्रतिभा, क्षमता र सम्भावना उमेर तथा पारिवारिक जिम्मेवारीका कारण सीमित हुनुपर्दैन भन्ने सन्देश दिएको छ। जीवनको जुनसुकै चरणमा पनि नयाँ सपना देख्न, आफ्नो क्षमता पहिचान गर्न र त्यसलाई उपलब्धिमा बदल्न सकिन्छ भन्ने उदाहरण उनले प्रस्तुत गरेकी छन्।
व्यक्तिगत सफलतासँगै अन्तर्राष्ट्रिय मञ्चमा नेपाली कला, संस्कृति र महिलाको प्रतिभा प्रस्तुत गर्न सफल श्रेष्ठको यात्रा आफ्ना सपना पूरा गर्न चाहने महिलाका लागि प्रेरणाको स्रोत बनेको छ। उनको अनुभवले सफलता हासिल गर्न उमेरभन्दा पनि आत्मविश्वास, निरन्तर प्रयास, पारिवारिक सहयोग र उपलब्ध अवसरको सदुपयोग गर्ने इच्छाशक्ति महत्त्वपूर्ण हुन्छ भन्ने सन्देश दिएको छ।