admin
काठमाडौं, वैशाख ३। तेज नेपाल
मातातिर्थ औंसीको पूर्वसन्ध्यामा आमाको ममता, त्याग र संघर्षलाई केन्द्रमा राख्दै ‘यःमा (मेरी आमा)’ बोलको म्युजिक भिडियो सार्वजनिक गरिएको छ।
गायक तथा संगीतकार ईश्वर अमात्यको संगीतमा तयार भएको उक्त भिडियो बिहीबार सिटी सेन्टरको फुड कोर्टमा एक कार्यक्रमका बीच सार्वजनिक गरिएको हो। कार्यक्रममा वरिष्ठ सिने पत्रकार विजयरत्न असंबरे प्रमुख अतिथिका रूपमा उपस्थित थिए।
आमाको संघर्षमय जीवन कथामा आधारित भिडियोमा सुजना बज्राचार्यले मुख्य भूमिका निर्वाह गर्नुभएको छ भने बाल कलाकार समाइरा खड्गीको समेत सशक्त अभिनय देख्न सकिन्छ।
गीतका शब्द कृष्णबहादुर नापित त्रिशुलीले रचना गर्नुभएको हो भने संगीत संयोजन सुरेन्द्र श्रेष्ठले गर्नुभएको छ। गीतमा स्वर जोशना अमात्यले दिनुभएको छ।
कार्यक्रममा समीक्षा गर्दै वरिष्ठ पत्रकार असंबरेले म्युजिक भिडियो केवल दृश्य प्रस्तुति मात्र नभई गीतको भावना दर्शकसम्म पुर्याउन सक्षम हुनुपर्ने धारणा व्यक्त गर्नुभयो। उहाँका अनुसार उक्त भिडियोले आमाको संघर्ष र भावनालाई सन्तुलित रूपमा प्रस्तुत गर्न सफल भएको छ।
निर्देशक दर्शनवीर शाक्यले परिकल्पना तथा निर्देशन गरेको यस भिडियोमा छायाङ्कन र सम्पादन मनोजरत्न शाहीले गर्नुभएको हो। प्रोडक्सन म्यानेजरको रूपमा उजय शाहीले काम गर्नुभएको छ।
टिमका अनुसार भिडियोले आमाको त्याग, माया र संघर्षलाई भावनात्मक ढंगले प्रस्तुत गर्दै दर्शकको मन छुने विश्वास गरिएको छ।
