admin
काठमाडौं, वैशाख २ । तेजनेपाल
नयाँ वर्षको सुरुवातसँगै काठमाडौं उपत्यकामा वाइफाइ सेवासहितको रात्रिकालीन बस सेवा औपचारिक रूपमा सञ्चालनमा आएको छ।
काठमाडौं महानगरपालिकाका कार्यवाहक प्रमुख सुनिता डंगोल, ललितपुर महानगरपालिकाका प्रमुख चिरीबाबु महर्जन, चन्द्रागिरि नगरपालिकाका प्रमुख घनश्याम गिरी तथा बुढानीलकण्ठ नगरपालिकाका प्रमुख मिठाराम अधिकारीले आपसी समन्वयमा समझदारी पत्रमा हस्ताक्षर गर्दै सेवा प्रारम्भ गरेका हुन्।
प्रारम्भिक चरणमा ७ वटा बस सञ्चालनमा ल्याइएको छ। यात्रुको सुरक्षालाई प्राथमिकता दिँदै प्रत्येक बसमा ४ वटा सीसीटिभी क्यामेरा जडान गरिएको छ, जसबाट चालक, अगाडिको दृश्य र यात्रुहरूको गतिविधि निगरानी गर्न सकिनेछ। यी सबै निगरानी नियन्त्रण कक्षबाट प्रत्यक्ष अवलोकन गर्न मिल्ने व्यवस्था गरिएको छ।
यात्रु सुरक्षाका लागि प्रत्येक बसमा १ जना नगर प्रहरी खटाइएको छ। यसले चोरी, दुर्व्यवहार तथा अन्य आपराधिक गतिविधिलाई तत्काल नियन्त्रण गर्न सहयोग पुर्याउने अपेक्षा गरिएको छ।
कार्यवाहक प्रमुख डंगोलका अनुसार, रात्रिकालीन सेवालाई दीगो बनाउँदै भविष्यमा विहानी सेवा समेत सञ्चालन गर्ने योजना रहेको छ। “पहिले आर्थिक प्रतिफलमा केन्द्रित थियौं, अब गुणस्तरीय र सुरक्षित सेवा हाम्रो प्राथमिकता हो,” उनले बताइन्।
ललितपुर महानगरपालिकाका प्रमुख महर्जनले स्थानीय तहबीचको सहकार्य नै सेवाको दीगोपनाको आधार भएको बताए। चन्द्रागिरि नगरपालिकाका प्रमुख गिरीले थानकोट नाकाबाट दैनिक ५० हजारभन्दा बढी मानिस आवतजावत गर्ने उल्लेख गर्दै यो सेवाले आर्थिक तथा सामाजिक गतिविधिमा सकारात्मक प्रभाव पार्ने विश्वास व्यक्त गरे।
बुढानीलकण्ठ नगरपालिकाका प्रमुख अधिकारीका अनुसार स्थानीयवासीहरू यस सेवाबाट उत्साहित छन् र यसको विस्तार आवश्यक रहेको बताएका छन्।
साझा यातायातका अध्यक्ष शुशिलराज प्याकुरेलले असार मसान्तसम्म सेवा सञ्चालनको लागत साझा यातायातले व्यहोर्ने र त्यसपछि स्थानीय तहहरूले लागत साझेदारी गर्ने जानकारी दिए।
रुट र समय तालिका
रात्रिकालीन बस सेवा दुई मुख्य रुटमा सञ्चालन हुनेछः
- दक्षिण रुट (१६ किमी): लगनखेल–पाटन अस्पताल–महाराजगञ्ज–गंगालाल–बुढानीलकण्ठ
- पूर्व–पश्चिम रुट (२० किमी): थानकोट–कलंकी–त्रिपुरेश्वर–जमल–बानेश्वर–तीनकुने–विमानस्थल
बसहरू विभिन्न चार विन्दुबाट सञ्चालन हुनेछन् र हरेक स्टपमा करिब २० मिनेटको अन्तरालमा सेवा उपलब्ध हुनेछ।
